CHRISTIANUS Septimus, Dei gratiâ, rex Daniæ, Norvegiæ, Vandalorum, Gothorumque, dux Slesvici, Holsatiæ, Stormariæ, atque Ditt­marsiæ, comes in Oldenburg ac Delmenhorst, &c. &c. Serenissimo ac potentissimo principi domino Georgio Tertio, eâdem gratiâ, Magnæ Britanniæ, Franciæ, et Hiberniæ regi, fidei defensori, duci Brunsvicensi, et Luneburgensi, Sacri Romani Impe­rii Archithesaurario, et Electori, &c. &c. fratri, affini, et consanguineo, et amico nostro caris­simo, salutem! Serenissime et potentissime prin­ceps, frater, affinis, consanguinee, et amice caris­sime! Annuentes precibus subditi cujusdam Majestatis Vestræ, viri eruditi, et linguarum Ori­entis peritissimi, Collegii Academiæ Oxoniensis Socii Gul. Jones, qui nobis desiderantibus, opus historicum vitæ Naderi Shah è Persico in Gallicum idioma à se magnâ cum diligentiâ translatum nuper in lucem emisit, eoque labore feliciter exantlato, expectationi nostræ ex asse satisfaciens calculum nostrum meruit, hoc ei nostræ benevolentiæ testimonium, quod à nobis sibi decenter expetiit, denegare noluimus, sed amicitiâ Majestatis Vestræ in nos sincerâ freti eundem clementiæ et benevolentiæ ejus regiæ, pro eo quo ipsa bonas literas, et earum cultores prosequi dignatur, favore eximio, de meliori commendatum esse amicè et fraternè cupimus; gra­tiam eo nomine Majestati Vestræ insignem habituri, et si qua in re possumus, referre paratissimi; cui, quod reliquum est, divini numinis tutelam ad perenne summæ felicitatis incrementum toto animo apprecamur. Dabantur in regiâ nostrâ Christianburg die XV. mensis Februarii, anno 1771 regnique nostri sexto.